ព័ត៌មានក្នុងខេត្ត

សូមស្វាគមន៍! ភ្ញៀវទេសចរជាតិ-អន្តរជាតិ និងសាធារណៈជនទាំងអស់ អញ្ជើញចូលរួមទស្សនាព្រឹត្តិការណ៍ប្រណាំងទូក នៅទីតាំងទំនប់សែនសុខដុម ក្រុងសែនមនោរម្យ ចាប់ពីថ្ងៃទី១៣-១៥ ខែវិច្ឆិកា ឆ្នាំ២០២៦ ដើម្បីអបអរសាទរពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ។

ការខិតខំប្រឹងប្រែង ការអនុវត្តបច្ចេកទេសកសិកម្ម និងការគាំទ្រពីគម្រោង LASED III បានក្លាយជាកម្លាំងជម្រុញឱ្យកសិករអាចផលិតបន្លែស្រស់ៗសម្រាប់គ្រួសារ និងបង្កើតឱកាសថ្មីៗបង្កើនប្រាក់ចំណូលដល់គ្រួរសារ ! នៅក្នុងភូមិស្រែខ្ទុម ឃុំស្រែខ្ទុម ស្រុកកែវសីមា ខេត្តមណ្ឌលគិរី អ្នកស្រី ធឿន សាវី ជាកសិករម្នាក់ដែលបានចាប់យកឱកាសក្នុងការដាំដុះបន្លែក្នុងផ្ទះសំណាញ់ ដើម្បីបង្កើនផលិតកម្មកសិកម្ម និងលើកកម្ពស់ជីវភាពគ្រួសារ។

ដើម្បីពង្រឹងសមត្ថភាព និងជំនាញបច្ចេកទេសដល់មន្ត្រីជំនាញថ្នាក់មូលដ្ឋាន ក្នុងកិច្ចការអភិរក្សជីវៈចម្រុះ នាថ្ងៃទី៧ និងទី៨ ខែវិច្ឆិកា ឆ្នាំ២០២៦ មន្ត្រីឧទ្យានុរក្ស បានចូលរួមក្នុងវគ្គបណ្តុះបណ្តាលស្តីពី «ការពិនិត្យអត្តសញ្ញាណសត្វព្រៃតាមរយៈប្រព័ន្ធកាមេរ៉ាស្វ័យប្រវត្តិ (Camera Trap)»។

នាព្រឹកថ្ងៃទី១០ ខែវិច្ឆិកា ឆ្នាំ២០២៦ លោក សី ទូច អភិបាល នៃគណៈអភិបាលស្រុកកោះញែក បានអញ្ជើញជាអធិបតីភាពក្នុងពិធីសំណេះសំណាល ជាមួយសិស្សានុសិស្សស្នាក់នៅអន្តេវាសិកដ្ឋាន នៃវិទ្យាល័យ ហ៊ុន សែន កោះញែក ចំនួន ២១៣នាក់ (ស្រី ១៦១នាក់) ដែលបានមកពីបណ្តាឃុំទាំង៦ ក្នុងស្រុកកោះញែក ខេត្តមណ្ឌលគិរី។

ខេត្តមណ្ឌលគិរី ៖ នាព្រឹកថ្ងៃទី០៩ ខែវិច្ឆិកា ឆ្នាំ២០២៦ រដ្ឋបាលខេត្តមណ្ឌលគិរី បានរៀបចំពិធីអបអរសាទរខួបអនុស្សាវរីយ៍លើកទី៧៣ នៃទិវាបុណ្យឯករាជ្យជាតិ (៩ វិច្ឆិកា ១៩៥៣ - ៩ វិច្ឆិកា ២០២៦) និងទិវាកំណើតកងយោធពលខេមរភូមិន្ទ យ៉ាងមហោឡារិក នៅបរិវេណវិមានឯករាជ្យ ស្ថិតក្រុងសែនមនោរម្យ។

ខេត្តមណ្ឌលគិរី ៖ ដើម្បីជំរុញ និងលើកទឹកចិត្តដល់ការកែច្នៃផលិតកម្មកសិកម្មក្នុងស្រុក នាព្រឹកថ្ងៃទី៨ ខែវិច្ឆិកា ឆ្នាំ២០២៦ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និងឯកឧត្តម គង់ គឹមនី អភិបាលខេត្តមណ្ឌលគិរី និងអាជ្ញាធរមូលដ្ឋាន បានអញ្ជើញចុះពិនិត្យ និងឈ្វេងយល់ផ្ទាល់ពីដំណើរការប្រកបរបរចិញ្ចឹមសត្វ និងដាំដុះដំណាំនៅ «កសិដ្ឋាន៤០០» ដែលមានទីតាំងស្ថិតនៅភូមិអូររណា ឃុំស្រែខ្ទុម ស្រុកកែវសីមា ខេត្តមណ្ឌលគិរី។

ខេត្តមណ្ឌលគិរី៖ ដើម្បីចូលរួមចំណែកសម្រាលទុក្ខលំបាក និងលើកកម្ពស់ជីវភាពរស់នៅរបស់ប្រជាពលរដ្ឋដែលមានជីវភាពខ្វះខាត នាព្រឹកថ្ងៃអាទិត្យ ទី៨ ខែវិច្ឆិកា ឆ្នាំ២០២៦ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា រួមដំណើរដោយ ឯកឧត្តម គង់ គឹមនី ប្រធានគណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី ឯកឧត្តម សាយ ម៉េងគីម អនុប្រធានអចិន្រ្តៃយ៍គណៈកម្មាធិការសាខា ព្រមទាំងសហការី និងអនុសាខាស្រុក បានអញ្ជើញចុះសួរសុខទុក្ខ និងនាំយកអំណោយមនុស្សធម៌ ព្រមទាំងថវិកាមួយចំនួន ផ្តល់ជូនស្រ្តីទើបសម្រាល ស្ត្រីត្រៀមសម្រាល ស្រ្តីក្នុងវ័យបន្តពូជ អ្នកផ្ទុកមេរោគអេដស៍ និងជនចាស់ជរាគ្មានទីពឹង សរុបចំនួន ១៥០គ្រួសារ នៅបរិវេណមណ្ឌលសុខភាពអូរអាម ស្ថិតក្នុងឃុំស្រែខ្ទុម ស្រុកកែវសីមា ខេត្តមណ្ឌលគិរី។

មណ្ឌលគិរី៖ ឯកឧត្តម សោម អូន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងលោក ហ៊ាញ ប៊ុណ្ណា អភិបាលរងខេត្តមណ្ឌលគិរី បានអញ្ជើញជាអធិបតីក្នុងកម្មវិធី «វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ» ដោយមានការអញ្ជើញចូលរួមពីលោក ណយ ច័ន្ទតារា ប្រធានមន្ទីរការងារ និងបណ្តុះបណ្តាលវិជ្ជាជីវៈ អាជ្ញាធរឃុំ ទីភ្នាក់ងារជាតិមុខរបរ និងការងារ (NEA) មន្ទីរការងារ និងបណ្តុះបណ្តាលវិជ្ជាជីវៈខេត្ត គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) បេឡាជាតិសន្តិសុខសង្គម (ប.ស.ស.) សាខាខេត្ត ស.ស.យ.ក. ព្រមទាំងតំណាងរោងចក្រ-សហគ្រាស ពលករវិលត្រឡប់ពីប្រទេសថៃ និងយុវជនដែលកំពុងស្វែងរកការងារធ្វើជាច្រើននាក់ ដែលប្រព្រឹត្តទៅនៅបរិវេណសាលាក្រុងសែនមនោរម្យ ខេត្តមណ្ឌលគិរី នាព្រឹកថ្ងៃទី០៧ ខែវិច្ឆិកា ឆ្នាំ២០២៦។

ខេត្តមណ្ឌលគិរី ៖ នាព្រឹកថ្ងៃទី៧ ខែវិច្ឆិកា ឆ្នាំ២០២៦ សាខាកាកបាទក្រហមកម្ពុជា ខេត្តមណ្ឌលគិរី បានរៀបចំពិធីប្រកាសទទួលស្គាល់គណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី អាណត្តិទី៦ ។ ពិធីនេះបានប្រព្រឹត្តទៅនៅសាលប្រជុំសាលាខេត្តមណ្ឌលគិរី ក្រោមអធិបតីភាព លោកជំទាវ ពុំ ចន្ទីនី អគ្គលេខាធិការ តំណាងកាកបាទក្រហមកម្ពុជា ដោយមានការអញ្ជើញចូលរួមពី ឯកឧត្តម អ្នកឧកញ៉ា អ៉ឹង ស៊ីតាតវីរៈ ប្រធានកិត្តិយសសាខាកាកបាទក្រហមកម្ពុជា ខេត្តមណ្ឌលគិរី និងឯកឧត្តម គង់ គឹមនី ប្រធានគណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី ព្រមទាំងមន្ត្រីពាក់ព័ន្ធជាច្រើនរូប។

ខេត្តមណ្ឌលគិរី៖ នារសៀលថ្ងៃទី០៦ ខែវិច្ឆិកា ឆ្នាំ២០២៦ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា រួមដំណើរដោយ ឯកឧត្តម សាយ ម៉េងគីម អនុប្រធានអចិន្រ្តៃយ៍ គណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី ព្រមទាំងក្រុមការងារសហការី បានអញ្ជើញចុះសួរសុខទុក្ខ និងនាំយកអំណោយមនុស្សធម៌ ព្រមទាំងថវិកាមួយចំនួន ផ្តល់ជូនជនចាស់ជរាគ្មានទីពឹង គ្រួសារកូនច្រើន និងមានជំងឺ ចំនួន ៣គ្រួសារ ដែលកំពុងរស់នៅភូមិស្វាយចេក សង្កាត់សុខដុម ក្រុងសែនមនោរម្យ។

ខេត្តមណ្ឌលគិរី ៖ ដើម្បីជំរុញលើកទឹកចិត្តប្រជាសហគមន៍ចូលរួមការពារព្រៃឈើឱ្យគង់វង្សយូរអង្វែង ក្រសួងបរិស្ថាន និងអាជ្ញាធរខេត្តមណ្ឌលគិរី បានប្រារព្ឋពិធីជំរុញចលនាភាពបៃតងនិងការលើកកម្ពស់ជីវភាពសហគមន៍ ជាមួយអ្នកសារព័ត៌មានក្នុងស្រុក ក្រោមធិបតីភាពឯកឧត្តម ខ្វៃ អាទិត្យា រដ្ឋលេខាធិការក្រសួងបរិស្ថាន និងលោក ងិន សុវិមាន អភិបាលរងខេត្ត តំណាងឯកឧត្តម គង់ គឹមនី អភិបាលខេត្តមណ្ឌលគិរី ។ ក្នុងពិធីនេះមានការអញ្ជើញចូលរួមពីលោក-លោកស្រីប្រធាន-អនុប្រធានមន្ទីរអង្គភាពជុំវិញខេត្ត អាជ្ញាធរមូលដ្ឋាន ប្រជាពលរដ្ឋ សិស្សានុសិស្ស និងអ្នកសារព័ត៌មានជាច្រើនរូប ដែលប្រព្រឹត្តទៅស្ថិតនៅដែនជម្រកការពារសត្វព្រៃកែវសីមា ក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី នាព្រឹកថ្ងៃទី០៦ ខែវិច្ឆិកា ឆ្នាំ២០២៦។

ថ្លែងក្នុងពិធីសំណេះសំណាលជាមួយយុវជនត្រូវចូលបំពេញកាតព្វកិច្ចយោធាវគ្គទី១ ឯកឧត្តម គង់ គីមនី មានប្រសាសន៍ថា ការស្ម័គ្រចិត្ត របស់ក្មួយៗនៅពេលនេះ គឺជាគំរូដ៏ល្អមួយសម្រាប់យុវជនជំនាន់ក្រោយ ក្នុងការបណ្តុះស្មារតីស្នេហាជាតិ ស្មារតីទទួលខុសត្រូវ និងការរួមចំណែកក្នុងកិច្ចការសង្គម។ នេះជាការបង្ហាញឱ្យឃើញថា យុវជន កម្ពុជាមានឆន្ទៈ និងមនសិការស្នេហាជាតិ ក្នុងការចូលរួមថែរក្សា និងការពារមាតុភូមិ។ ពិធីនេះបានរៀបចំឡើងនាព្រឹកថ្ងៃទី៤ ខែវិច្ឆិកា ឆ្នាំ២០២៦ នៅតំបន់ប្រតិបត្តិការសឹករងខេត្តមណ្ឌលគិរី ។