ពោធិ៍សាត់៖ ពិធីបិទបវេសនកាល និងប្រគល់រង្វាន់ជូនសិស្សជ័យលាភី សម្រាប់ឆ្នាំសិក្សា ២០២៤-២០២៥ ត្រូវបានរៀបចំឡើងយ៉ាងមហោឡារិកនៅវិទ្យាល័យពោធិ៍សាត់ ក្រោមអធិបតីភាព លោក ផាយ ឡេង អភិបាលក្រុងពោធិ៍សាត់ ដោយមានការចូលរួមពីថ្នាក់ដឹកនាំរដ្ឋបាលក្រុង លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។ ក្នុងឱកាសនោះ លោកអភិបាលក្រុង បានថ្លែងអំណរគុណ និងវាយតម្លៃខ្ពស់ចំពោះលោកគ្រូ អ្នកគ្រូ ដែលបានខិតខំបណ្ដុះបណ្ដាលសិស្សានុសិស្ស ប្រកបដោយស្មារតីទទួលខុសត្រូវខ្ពស់។ ជាមួយគ្នានេះ លោកបានអបអរសាទរ និងប្រគល់រង្វាន់លើកទឹកចិត្តជូនដល់សិស្សជ័យលាភីទាំងអស់ ព្រមទាំងបានផ្តាំផ្ញើឱ្យសិស្សានុសិស្សបន្តខិតខំរៀនសូត្រ ស្រាវជ្រាវបន្ថែម និងត្រូវចៀសវាងឱ្យឆ្ងាយពីគ្រឿងញៀន និងអំពើអបាយមុខផ្សេងៗ ដើម្បីក្លាយជាទំពាំងស្នងឫស្សី និងជាសសរទ្រូងដ៏រឹងមាំសម្រាប់ប្រទេសជាតិ៕

ពោធិ៍សាត់៖ លោក បិន វណ្ណា សមាជិកក្រុមប្រឹក្សាស្រុកក្រគរ បានអញ្ជើញចុះពិនិត្យមើលដំណើរការស្ថាបនាផ្លូវកៅស៊ូនៅក្នុងឃុំអន្លង់ត្នោត ស្រុកក្រគរ ខេត្តពោធិ៍សាត់ នាថ្ងៃទី៦ ខែសីហា ឆ្នាំ២០២៦។ ក្នុងសកម្មភាពចុះពិនិត្យនេះ ផ្លូវមួយចំនួនបានបញ្ចប់ការចាក់កៅស៊ូជាន់ទី២ រួចរាល់ហើយ ខណៈផ្នែកខ្លះទៀតកំពុងបន្តបាញ់កៅស៊ូជាន់ទី១។ លើសពីនេះ រដ្ឋបាលមូលដ្ឋានក៏កំពុងរៀបចំ បំពាក់អំពូលសូឡាបំភ្លឺផ្លូវ ដើម្បីបង្កើនសោភ័ណភាព និងសុវត្ថិភាពក្នុងការធ្វើដំណើរបន្ថែមទៀត។ ចំណុចដែលគួរឱ្យកត់សម្គាល់ និងទទួលបានការសរសើរខ្លាំងនោះគឺ បរិស្ថានតាមដងផ្លូវមានភាពស្អាតបាត និងគ្មានសំរាមទាល់តែសោះ ដែលស្តែងចេញពីកិច្ចសហការល្អរវាងអាជ្ញាធរ និងការចូលរួមថែរក្សាអនាម័យពីសំណាក់ប្រជាពលរដ្ឋក្នុងមូលដ្ឋាន៕

អភិបាលស្រុកកណ្តៀង និងលោក សុខ លីមុត ប្រធានក្រុមប្រឹក្សាស្រុក បានដឹកនាំក្រុមការងារចុះប្រគល់-ទទួលទំនប់ស្ទាក់ទឹកខ្នាតមធ្យមព្រែកក្បាលរមាស និងពិនិត្យការស្តារប្រឡាយព្រមទាំងសំណង់ធារាសាស្ត្រនៅឃុំអន្លង់វិល និងភូមិព្រែកឈើត្រាវ ដើម្បីលើកកម្ពស់វិស័យកសិកម្ម និងជីវភាពប្រជាពលរដ្ឋ។

អភិបាលស្រុកវាលវែង បានដឹកនាំមន្ត្រីរាជការចូលរួមប្រជុំ និងចុះសិក្សាទីតាំងសាងសង់ មជ្ឈមណ្ឌលបច្ចេកវិទ្យាសហគមន៍ ក្រោមវត្តមានឯកឧត្តម ប៊ិន សក្ដា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងលោក អ៊ុយ សុធាវី អភិបាលរងខេត្តពោធិ៍សាត់។

ស្នងការដ្ឋាននគរបាលខេត្តពោធិ៍សាត់ បាននាំយកថវិកាសមាគមមិត្តនគរបាលជាតិកម្ពុជាសរុប ១២លានរៀល ទៅប្រគល់ជូនគ្រួសារសពមន្ត្រីនគរបាលនិវត្តជនចំនួន ២គ្រួសារ (ក្នុងមួយគ្រួសារទទួលបាន ៦លានរៀល) ដើម្បីចូលរួមរំលែកទុក្ខ និងជួយសម្រាលបន្ទុកគ្រួសារ។

ក្រុមប្រឹក្សាស្រុកភ្នំក្រវាញបានបើក កិច្ចប្រជុំសាមញ្ញលើកទី២៧ អាណត្តិទី៤ ក្រោមអធិបតីភាព លោក សោម វិសាល ប្រធានក្រុមប្រឹក្សាស្រុក។ កិច្ចប្រជុំនេះផ្ដោតលើការពិនិត្យ និងអនុម័តរបៀបវារៈប្រចាំខែ ការតាមដានវឌ្ឍនភាពនៃការអភិវឌ្ឍស្រុក និងការផ្តល់សេវាសាធារណៈ ព្រមទាំងការដោះស្រាយបញ្ហាប្រឈមនានា ដើម្បីធានាការគ្រប់គ្រងរដ្ឋបាលមូលដ្ឋានឱ្យមានប្រសិទ្ធភាព តម្លាភាព និងដំណើរការដោយរលូន។