ព័ត៌មាន ទទក ប៉ៃលិន (វីដេអូ) : មន្ទីរកសិកម្មខេត្តប៉ៃលិន បើកយុទ្ធនាការទ្រង់ទ្រាយធំលើកដំបូង ចុះចាក់វ៉ាក់សាំងការពារជំងឺឆ្កែឆ្កួតដោយឥតគិតថ្លៃតាមខ្នងផ្ទះទូទាំងខេត្តប៉ៃលិន

យុទ្ធនាការទ្រង់ទ្រាយធំលើកទី១ នៃការចាក់វ៉ាក់សាំងការពារជំងឺឆ្កែឆ្កួតនៅទូទាំងខេត្តប៉ៃលិន ត្រូវបានប្រកាសបើកជាផ្លូវការ នាព្រឹកថ្ងៃទី២០ ខែតុលា ឆ្នាំ២០២៦ ក្រោមអធិបតីភាព លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន ដើម្បីទប់ស្កាត់ការឆ្លងរាលដាលនៃជំងឺដ៏កាចសាហាវនេះ មកលើមនុស្ស និងសត្វចិញ្ចឹម។ ពិធីបើកយុទ្ធនាការនេះ មានការចូលរួមពី លោក ខៀវ សុថុន ប្រធានការិយាល័យផលិតកម្ម និងបសុព្យាបាល, លោក ហាក់ សុចិត្រា តំណាងអគ្គនាយកដ្ឋានសុខភាពសត្វ និងផលិតកម្មសត្វ ព្រមទាំងអាជ្ញាធរមូលដ្ឋាន មន្ត្រីជំនាញ និងភ្នាក់ងារសុខភាពសត្វ សរុបចំនួន ៣៨នាក់ (ស្រី ៥នាក់)។