នាព្រឹកថ្ងៃទី០៣ ខែសីហា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញជាអធិបតីក្នុងពិធីប្រគល់ផ្ទះថ្មីចំនួន ៣ខ្នង ជូនដល់គ្រួសារវីរកងទ័ពដែលបានពលីជីវិត ក្នុងភូមិសាស្ត្រខេត្តកណ្តាល។ ផ្ទះថ្មីទាំងនេះ គឺជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត។
ខេត្តមណ្ឌលគិរី ៖ សមាគមអតីតយុទ្ធជន និងនិវត្តជនកម្ពុជា ខេត្តមណ្ឌលគិរី បានរៀបចំប្រារព្វខួបអនុស្សាវរីយ៍លើកទី១៩ ទិវាអតីតយុទ្ធជន និងនិវត្តជនកម្ពុជា ១២ ឧសភា ឆ្នាំ២០២៦ ក្រោមអធិបតីភាពឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និងជាអនុប្រធានកិត្តិយសអតីតយុទ្ធជន និងនិវត្តជនកម្ពុជា ខេត្ត ឯកឧត្តម គង់ គឹមនី អភិបាលខេត្តមណ្ឌលគិរី និងជាប្រធានគណៈកម្មាធិការអតីតយុទ្ធជន និងនិវត្តជនកម្ពុជា ខេត្ត រួមទាំងសមាជិក សមាជិកា គណៈកម្មាធិការសមាគម និង អ៊ុ ពូ មីង បង ប្អូន ជាអតីតយុទ្ធជន និងនិវត្តជនកម្ពុជា ខេត្តជាច្រើនរូប ដែលប្រព្រឹត្តទៅនៅសាលប្រជុំសាលាខេត្ត នារសៀលថ្ងៃទី០៤ ខែសីហា ឆ្នាំ២០២៦។
មណ្ឌលគិរី ៖ នៅព្រឹកថ្ងៃចន្ទ ៥រោច ខែទុតិយាសាធ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៣ ខែសីហា ឆ្នាំ២០២៦ លោក អ៊ុំ សារ៉ាន់ ប្រធានក្រុមប្រឹក្សាស្រុក និងលោក វណ្ណា ម៉ាប់ អភិបាលស្រុក និងជាប្រធានសហភាពសហព័ន្ឋយុវជនកម្ពុជាស្រុកពេជ្រាដា បានអញ្ជើញជាអធិបតីក្នុងពិធីសំណេះសំណាលជាមួយសិស្សានុសិស្សត្រៀមប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០២៥-២០២៦ មានសិស្សសរុបចំនួន ៥៣នាក់។ ពិធីនេះមានការចូលរួមពីលោក លោកស្រី សមាជិកក្រុមប្រឹក្សាស្រុក អភិបាលរងស្រុក កងកម្លាំងទាំងបីប្រភេទ អនុប្រធាន និងសមាជិក សហភាពសហព័ន្ឋយុវជនកម្ពុជាស្រុកពេជ្រាដា លោក លោកស្រី នាយករងរដ្ឋបាលស្រុក លោកប្រធានការិយាល័យអប់រំស្រុក លោក នាយកវិទ្យាល័យ លោកគ្រូ និងអ្នកគ្រូ សរុប ៩៤ នាក់ ដែលប្រព្រឹត្តទៅនៅសាលប្រជុំសាលាស្រុក។ ក្នុងកម្មវិធីនេះ ស.ស.យ.ក បានឧបត្ថមដល់គ្រូបង្រៀនបំប៉នសិស្ស ០២នាក់ ក្នុងម្នាក់ៗ ទទួលបានថវិកា ២៥០,០០០៛ (ថវិការបស់ ស.ស.យ.ក ខេត្ត) លោកគ្រូ អ្នកគ្រូ និងសិស្សានុសិស្ស ៧៣នាក់ ក្នុងម្នាក់ៗ ទទួលបាន៥០,០០០៛ ថវិការដ្ឋបាលស្រុក ៕
មណ្ឌលគិរី ៖ ដោយមានការយកចិត្តទុកដាក់ខ្ពស់ពីឯកឧត្តម គង់ គឹមនី អភិបាល នៃគណៈអភិបាលខេត្តមណ្ឌលគិរី នាព្រឹកថ្ងៃចន្ទ ទី៣ ខែសីហា ឆ្នាំ២០២៦ ក្រុមការងាររដ្ឋបាលស្រុកអូររាំង ដឹកនាំដោយលោក ឌុន សុខា ប្រធានក្រុមប្រឹក្សាស្រុក លោក សៀក មុន្នី អភិបាលនៃគណៈអភិបាលស្រុក រួមទាំងមន្ត្រីក្រោមឱវាទ ចុះសួរសុខទុក្ខដល់វីរៈកងទ័ពឈ្មោះ ញើច វិនដា អាយុ ៣៦ឆ្នាំ ឈរជើងនៅព្រំដែនមុំបីនៃខេត្តព្រះវិហារ ដែលមានទីលំនៅភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី មានជំងឺថ្លង់ត្រចៀក ដោយសារបាញ់អាវុធធុនB40ជាមួយចោរសៀមឈ្លានពាន ហើយបច្ចុប្បន្នសម្រាកព្យាបាលជម្ងឺគ្រុនឈាមកំរិតធ្ងន់ នៅមន្ទីរពេទ្យបង្អែក ខេត្តមណ្ឌលគិរី។
ខេត្តមណ្ឌលគិរី៖ នាព្រឹកថ្ងៃទី៣ ខែសីហា ឆ្នាំ២០២៦ ឯកឧត្តម ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និងឯកឧត្តម គង់ គឹមនី អភិបាលខេត្តមណ្ឌលគិរី បានអញ្ជើញជាគណៈអធិបតី ក្នុងពិធីប្រកាសចូលកាន់មុខតំណែងប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី ដោយមានការអញ្ជើញចូលរួមពី ឯកឧត្តមប្រតិភូអមដំណើរ ឯកឧត្តម លោកជំទាវសមាជិកក្រុមប្រឹក្សាខេត្ត តំណាងស្ថាប័នសាលាដំបូងខេត្ត និងអយ្យការអមសាលាដំបូងខេត្ត មេបញ្ជាការកងកម្លាំងទាំងបីប្រភេទ លោក លោកស្រីអភិបាលរងខេត្ត លោក លោកស្រីប្រធាន អនុប្រធានមន្ទីរ/អង្គភាពជុំវិញខេត្ត អភិបាល អភិបាលរងក្រុង-ស្រុកទាំង៥ លោក ព្រមទាំងលោកស្រីមេឃុំ ចៅសង្កាត់ទូទាំងខេត្ត និងមន្ត្រីពាក់ព័ន្ធជាច្រើនរូបទៀត។ ពិធីប្រកាសចូលកាន់មុខតំណែងប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីនេះ បានប្រារព្ធឡើងនៅសាលប្រជុំសាលាខេត្តមណ្ឌលគិរី ដោយលោក ទឹម មុនីរតន៍ ប្រធានមន្ទីរថ្មី ត្រូវទទួលភារកិច្ចជំនួសលោក លឹម ចាន់សុភី ដែលត្រូវចូលនិវត្តន៍៕
