បាត់ដំបង ៖ មន្ទីរសុខាភិបាលនៃរដ្ឋបាលខេត្តបាត់ដំបង នារសៀលថ្ងៃទី១៩ ខែតុលា ឆ្នាំ២០២៦ បានជួបប្រជុំពិភាក្សាជាមួយក្រុមការងារវាយតម្លៃមកពីមូលនិធិថែទាំសុខភាពអន្តរជាតិកូរ៉េ (KOFIH) ដែលរួមមានអ្នកជំនាញពីទីស្នាក់ការកណ្តាល និងទីប្រឹក្សាឯករាជ្យ ក្នុងក្របខ័ណ្ឌនៃការវាយតម្លៃពាក់កណ្តាលអាណត្តិគម្រោង «ការលើកកម្ពស់គុណភាពសេវាសង្គ្រោះបន្ទាន់ផ្នែកសម្ភព និងទារកទើបកើត នៅតំបន់ភាគពាយ័ព្យនៃប្រទេសកម្ពុជា» (EmONC) ។
ខេត្តមណ្ឌលគិរី ៖ នាព្រឹកថ្ងៃទី២០ ខែតុលា ឆ្នាំ២០២៦ លោក ជាក់ ម៉េងហ៊ាង និងលោក ចាន់ រតនា អភិបាលរងខេត្តតំណាងឯកឧត្តម គង់ គឹមនី អភិបាលនៃគណៈអភិបាលខេត្តមណ្ឌលគិរី លោក សុង គីមហេង ព្រះរាជអាជ្ញារងនៃអយ្យការអមសាលាដំបូងខេត្ត បានដឹកនាំកិច្ចប្រជុំសម្របសម្រួល និងចុះដោះស្រាយករណីជម្លោះដីធ្លី ដោយមានការចូលរួមពីមន្ត្រីជំនាញ មន្ត្រីពាក់ព័ន្ធ អាជ្ញាធរស្រុកទាំងពីរ តំណាងក្រុមហ៊ុន និង តំណាងប្រជាពលរដ្ឋ ដែលប្រព្រឹត្តិទៅនៅសាលប្រជុំសាលាស្រុកពេជ្រាដា ។ នៅក្នុងកិច្ចប្រជុំនេះ រដ្ឋបាលខេត្តបានបង្កើតក្រុមការងារខេត្តមួយដឹកនាំដោយលោក ជាក់ ម៉េងហ៊ាង អភិបាលរងខេត្តនិងជាប្រធានក្រុម ដើម្បីចុះពិនិត្យ សិក្សា និងអន្តរាគមន៍ទប់ស្កាត់ ការប្រមូលផ្តុំតវ៉ារបស់ប្រជាពលរដ្ឋ ដែលធ្វើសកម្មភាពរំលោភបំពានយកដីក្នុងតំបន់អភិវឌ្ឍន៍របស់ក្រុមហ៊ុន ឦសាន អេកូហ្សូន ឯ.ក និងក្រុមហ៊ុន CM Construction Co.,Ltd ដែលស្ថិតនៅក្នុងតំបន់សេដ្ឋកិច្ចពិសេសពហុបំណង ក្នុងភូមិសាស្ត្រស្រុកពេជ្រាដា និងស្រុកអូររាំង ខេត្តមណ្ឌលគិរី។ ក្រុមការងារខាងលើ នឹងធ្វើការសម្របសម្រួលជាមួយគ្រប់ភាគីពាក់ព័ន្ធ រួមទាំងតំណាងប្រជាពលរដ្ឋ ដើម្បីរកដំណោះស្រាយដោយសន្តិវិធី ស្របតាមនីតិវិធីផ្លូវច្បាប់ ៕
ខេត្តមណ្ឌលគិរី៖ លោកបណ្ឌិត សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានអញ្ជើញដឹកនាំក្រុមការងារបច្ចេកទេស ចុះពិនិត្យស្ថានភាពជាក់ស្តែងនៃការបង្កបង្កើនផល ការប្រមូលផលស្រូវ ការធ្វើបង្ហាញបច្ចេកទេសកសិកម្មវៃឆ្លាត ធន់នឹងការប្រែប្រួលអាកាសធាតុ និងការងារដាំដុះបន្លែរបស់ប្រជាកសិករ ស្ថិតនៅក្នុងឃុំរយ៉ និងឃុំអបួនលើ ស្រុកកោះញែក កាលពីថ្ងៃទី១៩ ខែតុលា ឆ្នាំ២០២៦។
មណ្ឌលគិរី៖ កាលពីថ្ងៃទី១៩ ខែតុលា ឆ្នាំ២០២៦ ឯកឧត្តម គង់ គឹមនី អភិបាលនៃគណៈអភិបាលខេត្តមណ្ឌលគិរី បានអញ្ជើញធ្វើជីវមាត្រ នៅការិយាល័យចុះឈ្មោះបោះឆ្នោត ដែលស្ថិតនៅក្នុងសាលាសង្កាត់សុខដុម ក្រុងសែនមនោរម្យ ខេត្តមណ្ឌលគិរី។ ការអញ្ជើញធ្វើជីវមាត្រនាពេលនេះ គឺជាផ្នែកមួយយ៉ាងសំខាន់នៃដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ដើម្បីផ្ទៀងផ្ទាត់ និងធ្វើបច្ចុប្បន្នភាពទិន្នន័យអត្តសញ្ញាណឱ្យមានភាពច្បាស់លាស់ ត្រឹមត្រូវ និងធានាបាននូវសិទ្ធិបោះឆ្នោតស្របតាមនីតិវិធីដែលបានកំណត់៕
ខេត្តមណ្ឌលគិរី៖ ក្រុមគ្រូពេទ្យ និងឆ្មបជំនាញនៃមណ្ឌលសុខភាពក្រង់តេះ បានទទួលការកោតសរសើរយ៉ាងខ្លាំងចំពោះស្មារតីទទួលខុសត្រូវ និងសកម្មភាពមនុស្សធម៌ដ៏ខ្ពង់ខ្ពស់ ក្នុងការចុះអន្តរាគមន៍បន្ទាន់ ជួយសម្រាលកូនជូនស្ត្រីម្នាក់ដែលមិនអាចមកកាន់មណ្ឌលសុខភាពទាន់ពេលវេលា រហូតទទួលបានជោគជ័យ និងមានសុវត្ថិភាពទាំងម្តាយ និងទារក។
